مدونة أكلنى

الكنافة بالقشطة الكدابة

الكنافة بالقشطة الكدابة

عمركم سمعتوا عن الكنافة بالقشطة الكدابة ,,, رحمة صلاح النهارده هتقدملنا طريقة عمل كنافة بالقشطة الكدابة و ربنا يسامحنا علي الكدبة دي
طريقتى فى كنافه رمضان (الكنافه بالقشطه الكدابة )
المقادير :
نص كيلو كنافه
كوباية نصف سمنة أو زبدة والنص التانى زيت
 2 كوباية لبن بارد
 4 معالق كبيرة نشا
الشربات لكل نص كيلو كنافه 2 كوباية شربات
طريقة التحضير :
 اول حاجه هنعمل القشطه الكدابة ( المهلبية) 2 كوباية لبن بارد وعليهم 4 معالق نشا كبار وعلى النار وقلبى لحد ما يتقل معاكى من غير سكر بس خلاص ونسيبهم لحد ما تبرد .
هنجيب بوله ونقطع فيها الكنافه كويس ونضيف عليها كوبايه السمنه والزيت وندعكهم كلهم مع بعض كويس جدا .
 وهاتى صنيه مدهونه سمن وحطى نص الكنافه وبغطا أو صنيه اصغر واضغطى جامد وعلى الاطراف كويس ونحط فى النص المهلبيه ونفردها على الاطراف وفى النص .
ونحط نص الكنافه التانى وتساويها بايدك وتضغطى براحه وعلى فرن درجة حرارته 200 ندخل الكنافة لمدة 30 دقيقة لغايه ما تلاقى الأطراف بقت دهبى خفيف شغلى الشوايه علشان الوش ياخد اللون الذهبي ونطفي عليها .
بالهنا والشفاء