مدونة أكلنى

طريقة عمل عجينة الباستا

طريقة عمل عجينة الباستا

المكرونة من الأكلات الأيطالية الأساسية في كل بيت مصري واللي بتعمل أكثر من مرة في الأسبوع و بطرق مختلفة بس اية رائيكم النهاردة مع مي محمد في انت الشيف هتقدملكم طريقة عمل عجينة الباستا في البيت بطريقة بسيطة و سهلة ومش بتحتاج وقت كبير أو مجهود ..
عجينه المكرونه أو الباستا الفريش....
المكونات :
- 300 جرام دقيق (3 مجات مش مكبوسين)
- 3 أو 4 بيضات حسب حجم البيضة .
- 30جرام زيت زيتون أو زيت نباتي (4معالق اكل)
- ربع معلقة صغيرة ملح.
- معلقة كبيرة خل ابيض *عشان زفاره البيض .
- انواع الباستا بدقيق السيمولينا الناعم جداااا .
- صفار البيض او بيض كامل لو متوفر عادي ممكن تشتغلوا بيه .
طريقة التحضير :
 نعجن على ايدنا أو بالعجانة مش هاتفرق المهم هاتطلع عجينه قاسيه وناشفه ماحدش يحط ميه ...هي لازم تطلع كده بعد مانعجنها نقسمها ونشيلها فى أكياس ونسيبها بره عالرخامه لمدة ساعه أو اتنين كل ماترتاح كل ماهاتريحنا فالفرد ..
بعد ما العجينة ارتاحت هنلاقيها طريت ولونها اغمق ..الدقيق اتشرب البيض والزيت وارتاح... موجوده الماكينه تمام نشتغل بيها مش موجوده مافيش مشكله نشتغل بالنشابه..
نحضر جمبنا بقا حوالي كبايه دقيق ومصفه عشان نرش الدقيق.. وفرشه ناعمه.. وحبه مياه لزوم اللزق...
بعد مانقسمها نفرد كل كوره لوحدها ..وبعدين نجمعهم فوق بعض وماننساش نرش دقيق بين الطبقات...ونفرد ...انا عن نفسي بحبها رفيعه تشبه ورقه الجلاش عشان مابسلقهاش بسويها ف الصلصه بتاعتها...ممكن تتخنوها عن كده ..بس مش اوي عشان ماتجلدش ف الاكل...
هنا بقا شويه لعب واشكال نقدر نعملها بس طبعا المقدار صغير يدوبك يطلع اكله من شكل واحد ...سواء لازانيا ..شرايط..فتوتشيني..تارتيلي..كانيلولي..واللي تشبه النيوكي(نوع عجينه باستا بس داخلها بطاطس مهروسه) ...وممكن رفايولي بس للاسف ماعنديش حشو عشان اجربها...المكرونه مخنقه ف عمايلها شويه..بس لو جينا قارنا الاسعار اقل كيس لازنيا من 45؛60ج ..المقدار ده يعمل صنيه محترمه تقريبا ب10؛15ج ...ده غير الطعم النضيف الطبيعي ليها ..
 سلق المكرونه الفريش ...ميه مغليه وملح ومش هانحط زيت..ننزل بالمكرونه ويدوبك دقيقه او دقيقتين علي حسب السمك ويكون الصلصه اي كانت جاهزه جمبينها ع طول ...المكرونه الفريش مش بتحتاج سوا كتير .لو شدينا عليها فالسوا هاتجلد وتمط...
في حاله المكرونه الازانيا او الاسطوانيه اللي بتتحشي انا مابسلقهاش بخلي الصوص بتاعها خفيف بتستوي معاه بتبقي تحفه...
جربوها و بالهنا و الشفاء